Menu
Cart 0

News

點解要執野嘅??唔知大家有冇以下同感呢??

Posted by Lab Star Beauty on

點解要執野嘅??唔知大家有冇以下同感呢??

新嘅一年黎到喇,又係時候去添置返啲新衫褲、新袋、新鞋⋯等等先!買埋咁多新野,擺邊好呀?望住間亂左成年嘅屋企,係出去購物前都係執返好間屋先,所以新年第一樣要做嘅野就係做.家.務! 媽呀,聽到都冇心情!好地地,點解要執野?之唔係因爲自己平日鐘意亂掉野。其實邊個唔想見到屋企乾乾淨淨、企企理理,但要的起心肝做大掃除真係好困難,永遠都係聽日做、後日做、放假做⋯結果當然就係冇做啦。 究竟點解我地咁唔想做家務?等我呢個專逃避做家務嘅人黎分享下啦! 「執左啲野會搵唔到架!」:對於四圍已經長時間混亂嘅朋友黎講,一切其實係亂中有序,我地永遠都可以能人所不能咁係一堆睇落亂七八糟嘅野入面好順手咁搵到自己想搵嘅野,反而一執好就會打亂我地嘅秩序,結果摷成日都搵唔返啲野呀。 「執完都好快亂返架啦!」:我唔係冇試過執,只係執完唔夠一星期又開始亂返,可以點算?咪唯有不斷地再執、再亂、再執、再亂⋯到最後就忍不住就會諗,等佢亂到頂唔順先執啦,可惜人嘅容忍能原來好高架,頂唔順個日有排都未到啦! 「我唔識做呢啲野架!」:所謂人人各有所長,我就最唔叻做家務架喇,人地輕鬆個幾鐘做完嘅野,可能要用左我成幾粒鐘呀!最慘係做到身水身汗,又唔係做得好喎,一唔小心又倒瀉呢樣、整濕個樣,唔通連做家務都要講天份?咁我都係安分守己好過啦。 不過其實講多無謂,唔想做家務歸根究底都係因應呢個字,就係「懶」呀!平時返足五日工已經好攰架喇,放假有時街都唔想出呀,只係想好好咁係張床度攤一日,瘋狂煲劇、玩電話⋯呢個時候叫我執野做家務,對腳就好似千斤重咁! 唔知大家有冇同感呢?不過踏入2017年,都係時候要改下啲壞習慣喇。其實每日做多少少,平時企理啲唔好亂掉野,最後咪唔洗亂到冇眼睇囉!各位朋友仔,加油啦!

更多 Read more →

保溫杯係女士們每日必備日常用品,但點樣清潔先岩呢?!

Posted by Lab Star Beauty on

保溫杯係女士們每日必備日常用品,但點樣清潔先岩呢?!

原來唔裝得??? 保溫杯點洗先乾淨?! 近排天氣又回暖喇,不過相信返開Office工嘅朋友們都冇太大感覺,因為Office個冷氣真係一年凍足365日,所以保溫杯可以話係辦公室必備之物!飲到暖笠笠嘅野緊係好啦,慘在啲漬好麻煩呢,想話唔洗一兩日姐,已經出異味喇,陣味仲好難除⋯   其實保溫杯畢竟係拎黎飲嘅,就當然要日日洗以保持衛生,但除此之外,其實正確嘅清洗方法都好重要,唔係洗得再密都變冇用功啦!今次就同大家分享下洗保溫杯嘅小貼士啦。 忌用百潔布:同洗碗碟一樣,好多人洗保溫杯乾淨都會要加洗潔精,但由於杯裡面係不銬鋼塗層,所以千萬唔可以用百潔布、菜瓜布呢啲可能刮花內層嘅清潔工具,最好選用海綿、長柄刷等質地柔軟啲嘅工具。 筷子夾紙巾:為左清淨保溫杯裡面嘅窿窿隙隙,唔花啲功夫係唔得架,大家可以試下用筷子夾住紙巾塞入杯入面抹乾淨邊邊角角嘅污糟野,方便得黎又簡單! 梳打粉洗杯:梳打粉用途百變,除左用黎整野食,仲係清潔好幫手添!將一茶匙左右嘅梳打粉加大約200ml熱水加入杯中搞勻,再搖下杯半分鐘到,污糟野就會溶解出黎,之後再用清水沖下就乾淨哂。 不過講到最難搞,都莫過於係陣異味,洗幾次都唔散呀,到底有咩方法? 用溫水加入洗米水、幾粒方糖、稀釋左嘅醋或者沖過嘅綠茶茶葉浸返半個鐘左右,再用熱水沖洗幾次,異味就會大大改善喇! 但唔講唔知,原來使用保溫杯裝野飲有唔少禁忌事項架,做左唔止搞壞個杯,仲有機會危害健康: 茶:用保溫杯長時間浸泡茶葉可能會釋出重金屬物質,影響人體架! 牛奶:長時間將牛奶保暖會破壞牛奶入面嘅營養,仲可能會滋生細菌,令我地腹瀉 酸度高飲品:酸性飲品如檸檬汁、橙子會損害保暖杯嘅不銹鋼內層,容易出現生銹問題 咁保溫杯唔通只能用黎裝水?其實好多朋友都會拎黎裝茶、咖啡,專家就話要裝唔係唔得,但切忌太長時間浸住,同埋記緊要清洗乾淨,咁問題就唔會太大架喇!

更多 Read more →

其實究竟點解啲衫咁易出UP味?知道左出噏味嘅原因,又係唔係咁易解決到?

Posted by Lab Star Beauty on

其實究竟點解啲衫咁易出UP味?知道左出噏味嘅原因,又係唔係咁易解決到?

香港地咁潮濕,洗衫乾衫都真係好麻煩架,尤其好似我咁嘅小市民,屋企個晾衫位又細,啲洗完嘅衫迫埋哂一齊,想乾得透都好難呀!結果搞到啲衫褲成陣噏味好似發霉咁,著上身唔止唔舒服,比人聞到的話,無論係男仔女仔都咁扣分。 其實究竟點解啲衫咁易出UP味? 唔講唔知,原來呢陣UP味好大機會係來自霉菌。相信大家都知道,溫暖、濕度高嘅環境好容易就滋生霉菌,所以香港可以話係霉菌嘅溫床!不過霉菌會出現係衫褲度,好多時都唔係平白無故架。有幾個洗衫晾衫嘅壞習慣,隨時搞到你嘅衫越洗越霉⋯ 室內晾衫:唔少香港人因爲唔夠空間、貪方便、怕落雨等等嘅原因,會選擇將啲衫晾係屋入面,仲濕緊嘅衫密質質晾埋一齊,仲要係咁唔通風嘅環境,難乾就緊架啦,霉菌自然就搵上門! 洗完唔晾:洗衫時間話長唔長,但話短都唔短架,香港人咁講效率,唔想哂時間等,有時會係出街或返工前開制洗衫,等返屋企先晾,但當洗完嘅衫扭成一團,放係洗衣機超過1個鐘,就已經會滋生唔少細菌。 堆埋一次過洗:儲夠衫先開機洗係好多人嘅習慣,尤其係自己一個住嘅朋友。之但係著過嘅衫唔多唔少都有汗漬同油脂,堆埋一齊更易噏出菌之餘,塞得洗衣機太滿亦更難洗得乾淨添架, 知道左出噏味嘅原因,又係唔係咁易解決到? 就算能夠改哂呢啲習慣(已經好好好困難!),其實都好難完全KO霉菌架,始終香港就係一年濕足十個月!無辦法之下,好多人都會選擇買返部乾衣機或者抽濕機,再唔係就唯有開多啲冷氣,希望環境乾爽啲,可以趕絕霉菌。但呢啲方法真係唔係時時岩用架,唔知大家有冇好似我咁遇到以下煩惱: 地方太細:屋企豆腐潤咁大,擺得洗衣機黎,又放唔落乾衣機,仲過想加埋部抽濕機添?真係行都唔使行咩⋯ 冬天唔會開冷氣:香港冬天好麻煩,凍兩日又暖兩日,有時凍得黎又係乾爽得去邊,啲衫一樣唔乾,咁涼又冇理由開冷氣架⋯⋯ 要用風筒吹:有時趕住著,啲衫又噏又濕,頂唔順就會拎個風筒黎吹下,但吹一件都吹成十幾分鐘,手攰之餘又哂時間⋯ 不過為左趕走呢陣味,我一定會繼續搜羅各種方法,再同大家分享!如果大家都同我一樣有咁嘅困擾,就記得密切喇。

更多 Read more →

每個月最難捱果幾日...真係有苦自己知

Posted by Lab Star Beauty on

每個月最難捱果幾日...真係有苦自己知

成日出現經痛問題,點算好? 做人難,做女人更難!女士們除左成日要諗點樣打扮、保養同keep fit,仲個個月都要同隻叫月經嘅怪獸打個你死我活,個種痛苦真係經歷過先知。香港地好多女仔都有經痛問題,嚴重起上黎唔單止痛到標哂冷汗,連床都落唔到添,有時忍住痛都仲要返工返學都咪話唔慘!其實大家都知經痛同日常生活習慣脫唔到關係,好似成日飲凍野、少做運動等等,但知易行難,尤其是係香港熱足大半年,鋪凍野癮真係好難戒⋯需知道要改變生活習慣係長期抗爭,但經痛就係個個月風雨不改咁搵上門,食藥又怕傷身,所以不如睇下有咩即時性改善經痛嘅方法啦。1. 熱敷:好多人黎m都會拎熱水袋或者暖貼黎暖下個肚,除左暖笠笠好舒服之外,熱敷仲會幫到腹部血液循環,仲會鬆弛肌肉,幫助經血排出,自然可以減輕經痛啦。2. 按摩:唔講唔知原來身體有幾個穴位係同經痛有關架,分別係肚臍對落嘅關元穴,手指公同食指之間嘅合谷穴、腳踝對上嘅三陰交穴,適量按摩呢啲位置有助調順血流,對減輕經痛好有幫助架。3. 少著緊身衣物:唔少女士m到期間都愛著緊身衣物,凝住會減少側漏,但原來係大錯特錯!因為緊身衣物有機會勒住小腹,令血液運行不順,加劇經痛!褲襠太緊仲會焗住私密部位,容易搞到細菌感染添。4. 黑糖:黑糖好飲又養生,含豐富嘅鐵質同鈣質,補血之餘仲可以幫助肌肉收縮同穩定神經,減緩痛楚。中醫角度都認為,黑糖可以溫經散寒、活血化瘀,可以緩和經痛,不過就唔係每個人嘅體質都適合,倒如熱性體質同糖尿病人都唔太岩飲架!當然啦,如果經痛一直持續,或者太過犀利,有機會係子宮出事架,女士們千萬唔好掉以輕心。

更多 Read more →

放假唔知去邊好?又想休息下,唔想同人迫,一於睇下喇!!

Posted by Lab Star Beauty on

放假唔知去邊好?又想休息下,唔想同人迫,一於睇下喇!!

放假去好處~ 係人都鐘意靚野架啦,尤其係街度見到啲裝修得好精美,仲要有哂主題嘅餐廳或者cafe,真係即刻比佢吸引住。我身邊有個朋友就最叻搜羅呢啲靚cafe,一放假就約埋成班閨蜜去歎個貴婦tea或者brunch,做一日港女,諗起就好期待下星期喇! 之但係唔係個個都咁有心機同時間去搜集資料架嘛,有時難得出到黎又諗唔到地方食野,唯有去返譚仔、m記都咪話唔沮喪,今次就同大家分享幾間高質靚cafe,睇完就唔驚下星期冇定去啦! 屋子生活 舊年先開業嘅屋子生活位於比馬鞍山,周邊環境比較寧靜,充滿寫意優閒嘅感覺,岩哂平時經常趕頭趕命嘅香港人黎放鬆下。屋子生活主打日式同台式食物,好幾種食材都係自家製造,仲有成三十幾款甜品選擇,由蛋糕到窩夫應有盡有。 最重要個到嘅裝修真係好靚好舒服,二千幾呎嘅空間、六米高嘅樓底,加埋道大落地玻璃,柔和嘅光曬落黎真係即時relax哂!全店嘅裝飾都好有風味,木色傢具、窗旁嘅塌塌米、懷舊海報,仲有由台灣設計師手繪嘅巨型壁畫,令人一去難忘呀! Manna。嗎哪 近年越開越多工廈cafe,其中高質都唔少架,但好多都集中係觀塘,位於大埔工廠區嘅Manna舊年新開張,係大埔區工廈餐廳嘅開荒牛,住附近啲朋友又多個好去處喇。Manna嘅食物偏西式,有意粉漢堡薯條沙律牛角包等等,亦有菠蘿包同通粉等嘅港式茶餐,連甜品都拍得住街外cafe架! Manna地方相當寬闊,風格摩登得黎帶點文青,一盞盞由天花板垂落黎嘅吊燈,加埋牆上面精美嘅壁畫,仲有寫係黑板嘅餐牌同角落嘅小書架,一時之間都唔就記得左自己仲係工廈呀。最好就係一坐可以坐好耐,想同閨蜜們傾幾耐都冇問題。 XOXO Cafe Lab 聽個名就知呢間XOXO Cafe Lab行比較調皮同創新路線啦,佢位於淘大商場,有齊韓台式料理,菜色吸引之餘仲好有創意,好似佢啲泡泡鍋飯,一睇以為係甜品黎添!至於真正嘅甜品就有好多款都用到棉花糖,淨係賣相都覺sweet,女士們實鐘意。 除左菜式豐富,淨係個裝修都餵得飽人呀。佢主打粉藍色調,裝飾可愛,清新之餘又有少女味。呢度地方唔算大,但相當骨緻,亦非常新淨,仲有齊大檯細檯,幾多人黎食都唔怕啦! The Cove Cafe Bar Bistro 希臘愛琴海相信無人不知,但原來香港都搵到愛琴海架!佢就係位於太子The Cove Cafe Bar Bistro喇,門口個白色小木欄同藍色屏風都係繁忙嘅大街到真係超超吸睛。至於食物就以西式為主,啲餐飲仲又靚又特別添! 全店以藍白色希臘風做主題,貼上好幾幅望落都心曠神怡嘅海洋風海報,連窗框、餐牌、書架同檯櫈都襯好哂色,真係似足愛琴海上面嘅藍白小屋。我最鐘意就佢啲位置有埋cushion仔,夠哂舒服!

更多 Read more →