Menu
Cart 0

放假唔知去邊好?又想休息下,唔想同人迫,一於睇下喇!!

Posted by Lab Star Beauty on

放假去好處~


係人都鐘意靚野架啦,尤其係街度見到啲裝修得好精美,仲要有哂主題嘅餐廳或者cafe,真係即刻比佢吸引住。我身邊有個朋友就最叻搜羅呢啲靚cafe,一放假就約埋成班閨蜜去歎個貴婦tea或者brunch,做一日港女,諗起就好期待下星期喇!

之但係唔係個個都咁有心機同時間去搜集資料架嘛,有時難得出到黎又諗唔到地方食野,唯有去返譚仔、m記都咪話唔沮喪,今次就同大家分享幾間高質靚cafe,睇完就唔驚下星期冇定去啦!

  • 屋子生活

舊年先開業嘅屋子生活位於比馬鞍山,周邊環境比較寧靜,充滿寫意優閒嘅感覺,岩哂平時經常趕頭趕命嘅香港人黎放鬆下。屋子生活主打日式同台式食物,好幾種食材都係自家製造,仲有成三十幾款甜品選擇,由蛋糕到窩夫應有盡有。

最重要個到嘅裝修真係好靚好舒服,二千幾呎嘅空間、六米高嘅樓底,加埋道大落地玻璃,柔和嘅光曬落黎真係即時relax哂!全店嘅裝飾都好有風味,木色傢具、窗旁嘅塌塌米、懷舊海報,仲有由台灣設計師手繪嘅巨型壁畫,令人一去難忘呀!

  • Manna。嗎哪

近年越開越多工廈cafe,其中高質都唔少架,但好多都集中係觀塘,位於大埔工廠區嘅Manna舊年新開張,係大埔區工廈餐廳嘅開荒牛,住附近啲朋友又多個好去處喇。Manna嘅食物偏西式,有意粉漢堡薯條沙律牛角包等等,亦有菠蘿包同通粉等嘅港式茶餐,連甜品都拍得住街外cafe架!

Manna地方相當寬闊,風格摩登得黎帶點文青,一盞盞由天花板垂落黎嘅吊燈,加埋牆上面精美嘅壁畫,仲有寫係黑板嘅餐牌同角落嘅小書架,一時之間都唔就記得左自己仲係工廈呀。最好就係一坐可以坐好耐,想同閨蜜們傾幾耐都冇問題。

  • XOXO Cafe Lab

聽個名就知呢間XOXO Cafe Lab行比較調皮同創新路線啦,佢位於淘大商場,有齊韓台式料理,菜色吸引之餘仲好有創意,好似佢啲泡泡鍋飯,一睇以為係甜品黎添!至於真正嘅甜品就有好多款都用到棉花糖,淨係賣相都覺sweet,女士們實鐘意。

除左菜式豐富,淨係個裝修都餵得飽人呀。佢主打粉藍色調,裝飾可愛,清新之餘又有少女味。呢度地方唔算大,但相當骨緻,亦非常新淨,仲有齊大檯細檯,幾多人黎食都唔怕啦!

  • The Cove Cafe Bar Bistro

希臘愛琴海相信無人不知,但原來香港都搵到愛琴海架!佢就係位於太子The Cove Cafe Bar Bistro喇,門口個白色小木欄同藍色屏風都係繁忙嘅大街到真係超超吸睛。至於食物就以西式為主,啲餐飲仲又靚又特別添!

全店以藍白色希臘風做主題,貼上好幾幅望落都心曠神怡嘅海洋風海報,連窗框、餐牌、書架同檯櫈都襯好哂色,真係似足愛琴海上面嘅藍白小屋。我最鐘意就佢啲位置有埋cushion仔,夠哂舒服!


Share this post



← <<Older Post Newer Post>> →


留言 Leave a comment

請注意,評論必須經過批准才能發布